बेलायतको नेपाली डायष्पोरामा पहिलोपटक तीन दिनसम्म टी ट्वान्टी क्रिकेट प्रतियोगिता

---

नेपाली लिङ् कजुन २८, २०२४ लन्डन– पोखरेली मञ्च यूकेले सातौं पिपल नेपाल कप टी ट्वान्टी क्रिकेट प्रतियोगिताको तयारी व्यापक गरिएको जनाएको छ ।

यही जुन ३०, जुलाई ३ र ७ तारिख गरी तीन दिनसम्म प्रतियोगिता हुन लागेको सम्भवतः नेपाली डायष्पोरामा पहिलो हो । प्रतियोगिताको टाइटल स्पोन्सर पीपल मोर्गेजेज छ ।

खर्चिलो खेल आयोजना गर्नुको मुख्य उद्देश्य बेलायतमा रहेका नेपाली क्रिकेटरहरुलाई प्रोत्साहन गर्नु रहेको पोखरेली मञ्च यूकेका अध्यक्ष करम गुरुङले बताए ।

सोनिङ लेन रेडिङस्थित रेडिङ क्रिकेट क्लब मैदानमा हुने पिपल नेपाल कपको सातौं संस्करणमा रेडिङ, अल्डरसट, लन्डन, केन्ट र मिडल्याण्डबाट ९ टिमले प्रतिष्पर्धा गर्दैछन् ।

हिमालयन क्रिकेट क्लब, क्वीन गोर्खा सिग्नल क्रिकेट क्लब, नेप्लिज वारियर क्रिकेट क्लब, माया क्रिकेट क्लब, रमाइलो क्रिकेट क्लब, नव युवा क्रिकेट क्लब, गोर्खा क्रिकेट क्लब केन्ट, गोर्खा टाइगर्स स्पोर्टस् क्लब र खुकुरी क्रिकेट क्लब प्रतिष्पर्धी छन् ।

प्रतियोगिताका विजेता टिमलाई १५ सय पाउण्ड नगद र ट्रफीसहित पुरस्कार दिइनेछ भने दोस्रो हुने टिमले ८ सय पाउण्ड नगद पुरस्कार प्राप्त गर्नेछ ।

यसका साथै वीनर हुनेले क्या. चन्द्रबहादुर पुन र सरिता पुनले स्पोन्सर गरेको रनिङ शिल्ड समेत प्राप्त गर्नेछ ।

त्यस्तै, प्रतियोगिताको सर्वोत्कृष्ट खेलाडीलाई म्यान अफ द सिरिजका रुपमा २ सय पाउण्ड नगद र ट्रफी प्रदान गरिनेछ । सर्वाधिक रन तथा सर्वाधिक वीकेट हासिल गर्ने दुवै खेलाडीलाई पनि १ सय ५० पाउण्ड नगद र ट्रफीसहित पुरस्कृत गरिनेछ ।

क्रिकेट खेल सञ्चालन गर्न आइसीसीबाट मान्यताप्राप्त रेफ्रीहरु ल्याइने इभेन्ट संयोजक तथा मञ्चका उपाध्यक्ष पवित्र गुरुङले बताए । क्रिकेट खेल संयोजक मञ्चका स्पोर्टस् कोअर्डिनेटर प्रकाश गुरुङले हरेक खेल पूरै २० ओभरमा खेलाइने र टीममा खेलाडी संख्या पनि ११ नै रहने जनाए ।

खेल समापनका दिन ७ जुलाईमा राष्ट्रिय कलाकारहरु भूमिका गिरी, शिवदास गुरुङ र जेनिहा लिम्बुले लाइभ परफर्मेन्स दिने भएका छन् ।

मञ्च अध्यक्ष करम गुरुङले इभेन्टमा सहभागी भएर खेलाडीलाई हौसला प्रदान गर्न सबैमा अपिल गरेका छन् ।

सन् २००८ मा स्थापित बेलायतको च्यारिटी संस्था मञ्चले सन् २०१६ देखि क्रिकेट प्रतियोगिता शुरु गरेको थियो । पहिलो खेल पोखरा कप नामाकरण गरि खेलाइएको थियो भने जम्मा ४ वटा टिममात्र सहभागी थिए । कोभिड महामारीका कारण केही वर्ष रोकिएपछि अहिले सातौं संस्करण हुन लागेको हो ।

मञ्चले यस इभेन्टपछि आउंदो जुलाई २६, २७ र २८ मा वेल्समा ‘हाइक फर नेपाल’ पनि गर्दैछ ।

Source Nepali Link